Maliana, 8 Agostu 2025 (RCM), Liu husi Asembleia Jerál Extra-Ordináriu Períodu 2025-2029, Joaquina Seixas eleitu ofisialmente nu’udar Jestora ba Rádiu komunidade Maliana.

Eleisaun hodi hili kandidatu foun ne’e realiza hafoin Jestor Filomeno Magalhaes Goncalves ne’ebe hakohu iis tanba sofre moras. Asembleia Jerál Extra-Ordináriu Períodu 2025-2029 hala’o ho demokrátiku ne’ebé partisipa hosi Administradór Postu Maliana, Agostu Caitano, Prezidente Konsellu Rádiu Maliana, Paulino Tilman ho nia membru no estrutura Rádiu.

Joaquina Seixas halao ninia knar iha mundu jornalismo desde tinan 2006 iha Rádiu komunidade Maliana no sempre hola parte mos iha formasaun Jornalismo iha munisípiu Dili.

Aleinde sai jornalista, Joaquina Seixas, antes ne’e halao mos knar nu’udar ofisiál finansa ba Rádiu Komunidade Maliana, no rekoñese hanesan pessoal ida ho dedikasaun, integridade, no kontribuisaun bo’ot ba Rádiu Komunidade Maliana ne’e rasik.

Iha elisaun ne’e, kandidatu 5 mak avansa maibe ikus mai Joaquina Seixas mak eleitu ho votus 11, Eva Sidonia ho votus 3 no Carlito de Oliveira ho votus 1 no nain 2 seluk la iha votus.

Entidade hotu ne’ebe partisipa iha Asembleia Jerál Extra-Ordináriu ne’e hato’o sira nia agradesimentu no apresiasaun ba Joaquina Seixas, no esperansa bo’ot katak Jostora eleitu nafatin kontinua vizaun no misaun Rádiu komunidade Maliana.

Ekipa RCM