BOBONARO, 28 dezembru 2022 (TATOLI) – Jestór Rádio Komunidade (RAKOM) Maliana, Filomeno Gonçalves Magalaens, hateten signál 91,07 FM (Frekuénsia Muduladu) nia transmisau la´os kobre de’it territóriu Munisípiu Bobonaro maibé transmite to’o Atambua Hali-Wen,Hali-Mesak, Kabupaten Bellu, Provínsia Nusa Tengara Timur (NTT) Repúblika Indonezia.

Nia haktuir iha fulan janeiru tinan kotuk 2021, Autoridade Nasionál Komunikasaun (ANC Sigla Portugues) autoriza tékniku hosi Diresaun Nasionál Promósaun Dezenvolvimentu Média LokáL mai halo mudança frenkuénsia hosi 91,07 FM ba 91,03 FM maibé frekuénsia refere Rádio Reja Wali mak domina tamba atu hanesan no kapasidade Pawer Transmiter 300 WAT ho númeru ne´ebé boot kompara ho RAKOM Maliana ne´ebé iha de´it Power 100 WAT.

Nunee mak fó impaktu ba RAKOM Maliana nia signál ne´ebé kobre de’it to´o iha Nunura no Suku Manapa, Postu Administrativu Cailaco tamba ne’e Ezekutivu sira haruka karta ba fali DMPDML atu adapta fali frekuénsia anterior 91,07 FM mak komunidade foin asesu di´ak hosi Rádiu Monitór no kualker telemóvel.

“Ami nia frekuénsia ne’e agora komunidade hosi Liquiça, Maubara Lisa, Loes, ba fali Ermera Postu Hatulia no Postu Atsabe hafoin Covalima, komunidade sira Fohorem, Fatumea, la´os de´it ida ne’e, iha mós ita nia komunidade nasaun vizinu Indonezía parte Atambua Haliwen ho Hai-Kesak mós asesu hotu,tamba foin lalais ha´u viajen privadu ba Atambua ha´u haree no rona-nain sira loke hela Rádiu Maliana”, Filomeno imforma ba Jornalista Tatoli, iha kna’ar Fatin Bairu Hospitál Tuan, kuarta ne’e.

Jestór ne’e esklarese normalmente iha tempu kalan liuhosi Programa Dedika Múzika komunidade nasaun vizinu sira sempre halo kontaktu direta no manda mensajen atu dedika múzika ba família sira iha Atambua no Timor-Leste liuliu iha Munisípiu Bobonaro.

“Sira dehan mai ami sira gosta rona Rádiu Komunidade Maliana liuliu katuas sira iha to’os ne’e akompaña hela de’it to’o Chanel ne’e taka tamba sira mós ema timoroan ne’ebé gosta akompaña Rádiu ne’e atu ami bele hatene situasaun iha Timor-Leste liuliu iha Munisípiu Bobonaro”, Jestor ne’e haktuir

RAKOM Maliana iha Programa Prinsipál Lima hanesan,News, Rádiu Talk, Drama, Avizu bai-bain,no Programa Pakote ne’ebé envia hodi Rádio Metro FM Dili,no Programa Animasaun sira hanesan Dedika Múzika, Poezia, Konta Istória no atualiza informasaun kona-bá previzaun tempu hosi Diresaun Nasionál Metrolojia.

Maibé Filomeno dehan durante ne’e labele kobre imformasaun sira ne’ebé akontese iha suku sira liuliu iha área Remotas.

“Ami menus Rekursu-umanu tamba iha de´it jornalista na’in hira depois ami iha de´it motór rua,maibé ida fali kondisaun la di’ak ona tamba ami sosa dezde 2015 nia kondisaun tuan los ona,la kleur avaria, entaun ami labele ba halo kobertura iha dook to’o suku sira, no mós agora mina folin sae, ami sente araska tamba fulan neen Governu apoia orsamentu ba kombustivél $200 de´it,ne´ebé ami sente la to’o”, katak.

RAKOM  parseiria ho Ministériu Asuntu Parlamentar no Komunikasaun Sosiál (MAPKOMS), apoiu subsídiu liuhosi Fundus Tranferénsia Públiku kada fulan neen ho montante ne’ebé la hanesan tamba depende ba orsamentu ne’ebé aprova iha Parlamentu Nasionāl.

Aleinde ne’e, parseiru mós ho Centru Nasionál Chega, Institutu Públiku (CNC,I.P Sigla Portigues) liuhosi Intervista Eskluziva ho ema sobrevivente sira kona-ba faktu sira moris hahú hosi pasadu to’o agora no halo re-transmisaun ba sira programa pakote ne’ebé haruka liuhosi Emile kada pakote selu $100.

Nune´e meós, UNICEF liuhosi Programa  Rejistu moris no Programa Rádiu Spot kona-ba Prevensaun Covid-19 kada programa ho nia publikasaun selu tuir menutu.

Rádiu Komunidade ne´e harii iha loron 20 fulan abril 2000, rekursu umanu hamutuk na´in neen no nain ida voluntáriu.

Jornalista: Sérgio da Cruz
Editór: Zezito Silva

Fonte Notísia : https://tatoli.tl/2022/12/28/rede-rakom-maliana-9107-fm-transimite-too-hali-wen-atambua/